維他奶股東大會2014

文章發表於半年前。

開會地點：金鐘JW Marriott酒店宴會廳
GOOGLE 47項評價達平均分達4.1

進場前獲派投票紙、食物券及贈品券各一張，而2014年報及會議明細則放置在旁供檢閱。
三時正，股東大會由執行主席羅友禮先生準時宣佈開始





羅友禮先生(筆者很想稱他為維他奶老人，因為個人交談中令筆者感覺到他有老人般的慈祥感覺)發表剛剛過去一季的業績，無乜實際上既數字但如集團一貫的作風，增長平穩，實而不華，俾現聽眾信心。

宣佈決議案之前，維他奶老人提及關於2020年既展望 及3年計劃 等兩項十分有趣而此前未有所聞既事，細節沒有特別公佈。路遙聽後心想，想不到維他奶還是相當有計劃，比年報、新聞更能企前一步去了解，不枉此行。
路遙出席股東會經驗尚少，好想就以上兩項發展多加追問，但就搵唔岩切入點…不過唔緊要，細節我多知道其實沒用，只需知道呢個管理層並執行者可以令人信任就okay！

維他奶老人其後宣讀各項決議案，其中有一段小插曲。當主席提到其中一個非執董要退任時，借其看似外國人但懂廣東話幽了一默，逗得滿堂大笑。

聽著決議案一項一項沉寂地通過時，心知時間無多，若不再發問就會似上次一樣平白地讓機會流走。膽粗粗地舉手就回購這個議題上提問：「維他奶有沒有任何回購計劃？因為據我所知，維他奶只在2001年時有做過幾次小量回購。維他奶老人從容地回答「沒有，因為公司將來很快又會有擴張既需求。」路遙再追問，其實回購可以增加股東價值，點解唔進行回購呢??。(因為年報中得知近年既業績不算太好，而現金亦有頗多)維他奶老人答「其實增加股東價值既方法有好多，用擴充產能增加銷售並壯大集團唔會係最好最直接既方法咩？點解反而要去回購股票呢??」

主席強調了兩次而面無變色，我這個小投資者也安心了。。。

會議之後也如常舉行，最後也有另一個股東問會否可以用以股代息既方法，我感覺老人還是誠懇地回答「會謹重考慮。」，無論最後成唔成事。

完結後大部分股東們紛紛去搶點心及贈品，而我則抓緊機會搵維他奶老人傾談，我向佢表達新出既港式奶茶太濃太甜，連路遙這個奶茶超級fans每次都飲剩。老人聽後都認同我既睇法，亦加入一句「鍾意飲奶茶既人係唔會介意既!!」，聽得路遙會心微笑。我再追問一句，你平時飲唔飲維他奶嫁? 老人答曰：「飲!! 日日都飲。」路遙從佢既語氣同表情睇得出甚是誠懇的。

看來維他奶相當高既溢價係有其原因，遍覽現場座位若有百多，空位甚少，坐著者大多公公婆婆或有相當年紀人仕。部分股東相信持股已有一段長時間，再加上基金持倉，無怪股價長期維持於30x左右市盈，無從入手。

而路遙現有既持股，睇黎未來最少六年都唔需要理會。學Munger話：「我們尋找的投資標的是一旦下注後便無需理會的優良及價格合理的企業。」學Buffett話：「我希望我手上持股既期限係永遠。」大道至簡。


股東會評分：維他奶國際股東會

教育性：A 聽到比年報更多既公司計劃及營運情況
娛樂性：B 羅先生偶然開玩笑舒緩氣氛
贈品：B 新出既港式奶茶紙包裝同PET裝 + 維他荳奶PET裝
飲食：A Marriott hotel tea set，好食

備註：
維他奶老人既說話態度誠懇，雖然滿頭白髮但不失活力，很令人信任。股東會地點就腳，贈品&點心豐富，值得一去。上年上任既CEO好高大!!